6. sæti
Magnús Freyr Ólafsson

Magnús Freyr Ólafsson er 38 ára gamall Akurnesingur. Magnús á eina nýfermda dóttur og er í sambúð með Guðrúnu Öldu Elísdóttur sem á einn son. Magnús ólst upp á Akranesi, fluttist þaðan þegar hann hóf háskólanám en sneri aftur á æskuslóðirnar fyrir fjórum árum.

Ég er líffræðingur að mennt en lauk mastersprófi í fiskifræði við háskólann í Bergen og síðar MBA námi frá Háskóla Íslands. Í dag starfa ég sem öryggisstjóri hjá Elkem Ísland auk þess sem ég á og rek Farfuglaheimili Akraness.

Umhverfið, skipulags- og atvinnumál
Ég er mikill náttúruunnandi og umhverfismál eru mér því sérstaklega hugfólgin. Ég mun stuðla að því að mótuð verði umhverfisstefna Akraneskaupstaðar sem unnið verður eftir og hefur stórt vægi í allri skipulagsvinnu til framtíðar.

Sem aðili að uppbyggingu fyrirtækja og atvinnulífs á Akranesi hef ég orðið var við mikinn vanmátt og stefnuleysi bæjaryfirvalda í þeim efnum. Ég tel að við eigum vannýtt tækifæri á sviðum ferðaþjónustu og matvælaframleiðslu, svo fátt eitt sé nefnt.

Nálægðin við borgina tækifæri
Við Akurnesingar eigum að líta á nálægð okkar við höfuðborgarsvæðið sem tækifæri fremur en ógn. Við þurfum að spyrja okkur hvaða þjónustu og vörur við getum boðið stærsta markaðssvæði landsins.